Ég vil jólastress

Kannski er ég pínu skrýtin, en ég vil jólastress.

Mér finnst alls ekki nógu spennandi að vera búin að öllum jólaundirbúningi í nóvember (eða fyrr) og geta bara slakað á í desember. Sumir eru að "monta" sig af þessu en ég bara skil það engan vegin.

Ég byrjaði svo sem líka snemma að kaupa gjafir, þannig séð. Keypti nokkrar í London í september, í Köben í október og svo keypti ég eina í gær. Jólafötin á ormagormana komin og er byrjuð að föndra jólakortin.

En ég vil bara alls ekki klára strax. Alls ekki! Mér finnst stressið tilheyra jólunum. Kannski er maður orðin svona gegnumsýrður af þessu stressaða samfélagi að maður kann ekki lengur að vera óstressaður. Ætli það sé málið?

Finnst fátt jafnast á við að eiga eina mikilvæga gjöf eftir á Þorláksmessu. Hendast búð úr búð í svitakasti, viss um að maður finni aldrei það sem maður er að leita að. Kannski af því að maður veit ekki hverju maður er að leita að.

Held líka að stressið fyrir jólin eigi stóran þátt í því hvað mér finnst aðfangadagskvöld alltaf notalegt. Þá getur maður loksins notið þeirrar vinnu sem maður hefur lagt í dagana á undan. Þrifanna skreytinganna, pakkanna o.s.f.v. Svo getur maður notið þess að vakna á jóladagsmorgun og sjá að húsið lítur aftur út eins og eftir sprengjuárás ;-)

Ég hlakka sko til jólanna!

Athugasemdir

[Ólafur fannberg, 21.11.2006 kl. 19:19]

hlakka lika til

[Hulda Dagmar Magnúsdóttir, 21.11.2006 kl. 23:52]

Vá hvað þú ert heppin að njóta þess að vera í stressi á meðan aðrir eru við það að fá magasár  ... ég er nú reyndar alveg laus við þennan æsing, nema reyndar  að þurfa að slá upp barnaafmæli á jóladag sem verður að vera hápunkturinn og toppa sjálf jólin getur stundum kallað á smá stress  Ég hlakka samt líka til.

[Gurrý (IP-tala skráð) 23.11.2006 kl. 00:13]

Hvað er jólastress? Ég held að það sé m.a. myndin sem fjölmiðlar draga upp mörgum vikum fyrir jólahátíðina. Mér sýnist að dagblöðin láti ekki sitt eftir liggja og eru löngu farin að eiga smáviðtöl við fólk um ýmislegt sem tengist jólum og jólahaldi. Eða þegar landsmenn sáu það í fréttatíma sjónvarpsins fyrir ári síðan að plasma-skjáir væru jólagjöf ársins 2005! Ekki veit ég hvort þorri landsmanna lét gabba sig með þessum hætti en stundum finnst mér áreitið vera það mikið að ég vildi helst láta mig hverfa um þetta leyti árs. Afturámóti held ég að það sé ekkert jólastress hjá þér, heldur kunnir þú að njóta þess jákvæða sem jólin hafa uppá að bjóða